Quaiser Khalid
hijr-o-visal ke na.e manzar bhi a.enge
abadiyon men aa.e to phir ghar bhi a.enge
asan nahin hai utni talash-e-jahan-e-nau
DhunDoge gar jazire samundar bhi a.enge
ai vaqt Dar hai tere ḳhudaon ko bas yahi
be-nang-o-nam hain jo barabar bhi a.enge
duniya isi ka naam hai har samt hi yahan
ban kar yaqin guman ke mehvar bhi a.enge
ai chashm-e-iltifat ye fōtpath ye saḌak
hain muntazir ki in pe qalandar bhi a.enge
maujon se laḌne dijiye kuchh der vaqt ki
jin men hai hausla vo ubhar kar bhi a.enge
hain naqsh-e-pa jahan jahan insan ke, dekhna
qadmon men aadmi ke vo ambar bhi a.enge
mayus yuun na bahr-e-adab ho, tu sabr kar
tujh ko ubuur karne shanavar bhi a.enge
nakam si rifaqaten le kar kabhi yahan
dasht-e-vafa ki sair ko dilbar bhi a.enge
aajiz ho aql dekh ke sanna.i jin ki vo
husn-e-jahan ke nit-na.e paikar bhi a.enge
tere liye jo vahm hai un ke liye yaqin
akasr yahan guman ke mehvar bhi a.enge
badla hua mizaj hai is baar vaqt ka
lahron ki zad men ab ke shanavar bhi a.enge
baton se phuul jhaḌte the lekin ḳhabar na thi
ik din labon se un ke hi nashtar bhi a.enge
Dhaoge tum jo mehvar-e-afkar ko to phir
ye jaan lo ki ghaib se lashkar bhi a.enge
ham vo ḳhuda-taras hain faqiri hai jin ki shaan
yunhi rahe to dar pe sikandar bhi a.enge
kab ishq ruk saka hai masa.ib se vaqt ke
divane ḳhak-o-ḳhun men naha kar bhi a.enge
honi hai ḳhatm un ki bhi mohlat yaqin rakho
ye vaqt ke ḳhuda tah-e-ḳhanjar bhi a.enge
afaq se pare hai mira mehvar-e-ḳhayal
hai hausla to phir na.e shahpar bhi a.enge
Leave a Reply