Phira Kisi Ka Ilahi Kisi Se Yar Na Ho

phira kisi ka ilahi kisi se yaar na ho

koi jahan men bargashta-e-rozgar na ho

ham us ki chashm-e-siyah-mast ke hain mastane

ye vo nashe hain ki jis ka kabhi utaar na ho

jahan men koi kahta nahin khuda-lagti

vo kya kare jise dil par bhi ikhtiyar na ho

na phade daman-e-sahra ko kyuun ki dast-e-junun

raha jab apne gareban men ek taar na ho

na khel jaan par apni tu ai dil-e-nadan

khuda ko yaad kar itna tu be-qarar na ho

na bhuul zohd pe lazzat se bakhshish-e-haq ki

vo be-nasib hai jab tak gunahgar na ho

tumhare sar ki qasam kha ke dard dil ka kahun

jo mere likhne ka yuun tum ko e’tibar na ho

janab-e-shaikh ji sahib main ek arz karun

agar mizaj-e-muqaddas pe nagavar na ho

janab rindon se milte to hain pe Dar hai mujhe

ki dushmanon ka kisi din vahan achar na ho

bahut hai khema-e-gardun ke phunkne ko to ‘aish’

is ah-e-tufta jigar men asar hazar na ho

Leave a Comment