meri halat dekhiye aur un ki surat dekhiye
phir nigah-e-ghaur se qanun-e-qudrat dekhiye
sair-e-mahtab-o-kavakib se tabassum ta-bake
ro rahi hai vo kisi ki sham-e-turbat dekhiye
aap ik jalva sarasar main sarapa ik nazar
apni hajat dekhiye meri zarurat dekhiye
apne saman-e-ta.ayyush se agar fursat mile
bekason ka bhi kabhi tarz-e-ma.ishat dekhiye
muskura kar is tarah aaya na kiije samne
kis qadar kamzor huun main meri surat dekhiye
aap ko laaya huun viranon men ibrat ke liye
hazrat-e-dil dekhiye apni haqiqat dekhiye
sirf itne ke liye ankhen hamen baḳhshi ga.iin
dekhiye duniya ke manzar aur ba-ibrat dekhiye
maut bhi aa.i to chehre par tabassum hi raha
zabt par hai kis qadar ham ko bhi qudrat dekhiye
ye bhi koi baat hai har vaqt daulat ka ḳhayal
aadmi hain aap agar to admiyat dekhiye
phuuT niklega jabin se ek chashma husn ka
sub.h uTh kar ḳhanda-e-saman-e-qudrat dekhiye
rash.ha-e-shabnam bahar-e-gul farogh-e-mehr-o-mah
vaah kya ash.ar hain divan-e-fitrat dekhiye
is se baḌh kar aur ibrat ka sabaq mumkin nahin
jo nashat-e-zindagi the un ki turbat dekhiye
thi ḳhata un ki magar jab aa ga.e vo samne
jhuk ga.iin meri hi ankhen rasm-e-ulfat dekhiye
ḳhush-numa ya bad-numa ho dahr ki har chiiz men
‘josh’ ki taḳh.il kahti hai ki nudrat dekhiye
Leave a Reply