Ashu Mishra
ab aur dam na ghuTe raushni ka kamre men
dariche va hon ujalon ki dauḌ puuri ho
jo ḳhvab aa.en to dekhun tujhe main ji-bhar ke
ki niind aa.e to ḳhvabon ki dauḌ puuri ho
koi baḌha.e zara asman ki vus.at
main chahta huun parindon ki dauḌ puuri ho
kisi azaab se ruk jaa.e raqs qatil ka
gharon ko lauTte bachchon ki dauḌ puuri ho
main tere hijr ke aalam men ji nahin sakta
so ab yahi ho ki sanson ki dauḌ puuri ho
Leave a Reply