bar-sar-e-dard zamane ka bhi socha jaa.e
phir naya qarz uThane ka bhi socha jaa.e
samne chand hai par aur koi chara nahin
chashm-e-namnak churane ka bhi socha jaa.e
hiddat-e-husn-e-nazar se bhi bacha kar ḳhud ko
ishq men risk uThane ka bhi socha jaa.e
ḳhvab se lipTi hue yaad ke saada lamho
dard ke haath na aane ka bhi socha jaa.e
ishq to yaar adaon ko nigal jaata hai
husn-e-bebak bachane ka bhi socha jaa.e
cigareten phunk ke kuchh jaam chaḌha kar janan
kuchh tira hijr manane ka bhi socha jaa.e
Leave a Reply