ye bhuul ja ki hain tere bhi gham-gusar bahut
banana kaghzi phulon ke ḳhushk haar bahut
jo chashm-e-yar hai hosh-o-ḳhirad shikar bahut
dil-o-nazar pe hamen bhi hai iḳhtiyar bahut
ham apne vaqt ki tasvir-e-masḳh-surat hain
dikha.e ham ko na a.ina rozgar bahut
ḳhuda vo vaqt na laa.e ki azma.ish ho
ta.alluqat tumhin se hain ustuvar bahut
kisi bhi shaḳh pe jab mera ashiyan na mila
chaman men aaj phiri barq be-qarar bahut
dil-e-tabah ki nairangiyon ka haal na puchh
gahe qarar bahut gaah be-qarar bahut
hayat nazish-e-kaunain ho to kya gham hai
vo chaar din ki sahi umr-e-musta.ar bahut
hamen to apni vafaon ka mil raha hai sila
jafa-o-jaur pe vo kyuun hain sharmsar bahut
bahut dinon se ab apni talash men gum hain
‘ra.is’ chhan chuke ḳhak-e-ku-e-yar bahut
Leave a Reply