koi nazara na ḳhud se alahada kiije
nazar-nazar men hain jalve mua.ina kiije
nazar ko pahle jila de ke a.ina kiije
phir us ke ba.ad ḳhudi ka mushahida kiije
ḳhudi ḳhuda se juda ho to be-ḳhudi achchhi
vajud vahm hai is ko alahada kiije
nazar se duuri bhi vaj.h-e-huzuri-e-dil hai
huzur tajraba achchha hai tajraba kiije
unhi ka dar hi to hai bazm-e-mumkinat tamam
jabin-e-shauq ko phir vaqf-e-bargah kiije
siyah baḳht ko chamkana hai agar manzur
phir apne nama-e-a.amal ko siyah kiije
tamam chashm-e-karam aam hai zamane par
idhar bhi chashm-e-karam apni gah-gah kiije
jo be-talab ho ḳhushi us ka kijiye matam
kabhi to lazzat-e-gham ko bhi ba-maza kiije
‘hayat’ tab.a-e-ravani men koi farq nahin
chaman tumhara hai ji bhar ke zamzama kiije
Leave a Reply