Apne Lahu Se Nam Likha Ghair Ka Bhi Dekh

apne lahu se naam likha ghair ka bhi dekh

zinda hai to shaqavat-e-dasht-e-bala bhi dekh

ankhon ke ainon ka to paani utar gaya

ab jism chob-e-khushk hai ye saneha bhi dekh

hoti hai zindagi ki hararat ragon men sard

sukhe hue badan pe ye chamda kasa bhi dekh

betabiyon ko siine ke andar samet le

fitne ko apni had se musalsal badha bhi dekh

har zarra ibraton ke samundar ki shakl hai

sahra-navard-e-shauq kabhi naqsh-e-pa bhi dekh

pahchan apni ho to mile manzil-e-murad

‘nahid’ gaahe gaahe sahi aaina bhi dekh

Leave a Comment