a.ine ka munh bhi hairat se khula rah ja.ega
jo bhi dekhega tujhe vo dekhta rah ja.ega
ham ne sab kuchh taj diya teri rifaqat ke liye
tujh se bichhḌe to hamare paas kya rah ja.ega
mil sakenge kis tarah ḳhvabon men ham jab hijr se
niind ho ja.egi ruḳhsat ratjaga rah ja.ega
ham agar teri raza hasil nahin kar pa.enge
umr bhar ham se hamara dil ḳhafa rah ja.ega
jaane valon ki kami puuri kabhi hoti nahin
aane vaale a.enge phir bhi ḳhala rah ja.ega
murta.ish avaz ki lahren rahengi der tak
saaz chup ho ja.enge sail-e-sada rah ja.ega
‘hir’ ko ‘gulzar’ le ja.enge kheḌe ek din
bansuri par tu dhunen hi chheḌta rah ja.ega
Leave a Reply