amanat mohtasib ke ghar sharab-e-arghavan rakh di
to ye samjho ki buniyad-e-ḳharabat-e-mughan rakh di
kahun kya pesh-e-zahid kyuun sharab-e-arghavan rakh di
miri taufiq jo kuchh thi bara.e mehman rakh di
yahan tak to nibhaya main ne tark-e-mai-parasti ko
ki piine ko uTha li aur liin angḌa.iyan rakh di
janab-e-shaiḳh mai-ḳhane men baiThe hain barahna-sar
ab un se kaun puchhe aap ne pagḌi kahan rakh di
tumhen parva na ho mujh ko to jins-e-dil ki parva hai
kahan DhunDun kahan phenki kahan dekhun kahan rakh di
laga lenge use ahl-e-vafa be-shubah ankhon se
agar pa-e-adu par us ne ḳhak-e-astan rakh di
idhar par noch kar Daala qafas men uf re bedardi
udhar ik jalti chingari miyan-e-ashiyan rakh di
zamir us ka Dubo dega use ab-e-ḳhajalat men
vafadari ki tohmat ghair par kyuun bad-guman rakh di
havas masti ki ‘sa.il’ ko nahin kaafi hai thoḌi si
pyale men agar pas-ḳhurda-e-pir-e-mughan rakh di
Leave a Reply