badalti rut pe havaon ke sakht pahre the
lahu lahu thi nazar daagh daagh chehre the
ye raaz khul na saka harf-e-narsa pe mire
sadaen tez bahut thiin ki log bahre the
vo pujne ki siyasat se khuub vaqif tha
vahi chadhae jo gende ke zard sehre the
jo bhaai laut ke aae kabhi na dariya se
unhin ke baazu qavi the badan ikahre the
usi sabab se mira aks tuut tuut gaya
us aaine men kai aur bhi to chehre the
samundaron ka vo pyasa tha aur os thi main
vo abr laut gaya jis ke lab sunahre the
in anchalon pe koi sajda-rez ho na saka
ki jin ke rang bahut shokh aur gahre the
samaaton ke dhundlakon men kho gae ‘shabnam’
vo saare lafz jo palkon pe aa ke thahre the
Leave a Reply