yadon ki tajsim pe mehnat hoti hai
bekari bharpur mashaqqat hoti hai
aisa khali aur itna gunjan abad
aine ko dekh ke hairat hoti hai
divaron ka apna sahra hota hai
aur kamron ki apni vahshat hoti hai
us ko yaad karo shiddat se yaad karo
is se tanhai men barkat hoti hai
bachpan jauban aur budhapa aur phir maut
sab chalte rahne ki aadat hoti hai
jiina to bas lafz hai ik be-maani lafz
maut se pahle maut ki fursat hoti hai
aisi azadi ab aur kahan hogi
ishq men sab karne ki ijazat hoti hai
aansu moti jugnu taara suraj chand
har qatre ki apni qismat hoti hai