bahut dinon se udaas nazron ki rahguzar thi
padi thiin soti ufuq ki rahen
ki dil ki mahfil men
naghma o naala o nava ki
ajab si shorish nahin hui thi
nazar uthai to duur dhundli fazaon men
raushni ka ik daera sa dekha
laraz ke thahra jo dil
takhayyul ne apne shahpar faza men khole
ki jaise
parvaz ka sahifa khule
to niile gagan ke asrar jaag utthen
ki jaise
maah o nujum ki mamlikat ka rasta koi bata de
faza se parde koi utha de
ki jaise
ik be-kanar sahra men
mauj-e-reg-e-ravan nuqush-e-navi bana de
ki jaise taer-e-hava ki lahron pe, jumbish-e-par se
dastan-e-vajud likh den
ki jaise
tarik shab ke daman men
dast-e-qudrat, charagh-e-dil yak-ba-yak jala de
Leave a Reply