dil asir-e-gham-e-dauran hai ghazal kya kahiye
zindagi sar-ba-gareban hai ghazal kya kahiye
ab to har naqsh numayan hai ghazal kya kahiye
dil charagh-e-tah-e-daman hai ghazal kya kahiye
chehra-e-sho.ala-o-shabnam pe barasta hai dhuan
barq ki zad men gulistan hai ghazal kya kahiye
zulf-e-shab-rang ka afsana ḳhush-a.ind sahi
ru-ba-ru sham-e-ghariban hai ghazal kya kahiye
zauq par chha.i hain munh bolti zinda ghazlen
ham hain aur majma.a-e-ḳhuban hai ghazal kya kahiye
hal-e-dil ghair nazar ḳhira paraganda dimagh
hashr ka din shab-e-hijran hai ghazal kya kahiye
fursat-e-tazkira-e-kakul-o-ruḳhsar kahan
jauhari daur men insan hai ghazal kya kahiye
bu-e-gul nala-e-dil dud-e-charagh-e-mahfil
bazm ki bazm pareshan hai ghazal kya kahiye
faiz se jis ke chaman-zar-e-suḳhan tha sairab
ḳhushk vo chah-e-zanaḳhdan hai ghazal kya kahiye
man ki duniya pe to chha.e hain andhere har su
tan ki duniya men charaghan hai ghazal kya kahiye
bazm-e-afkar ko rakhti thi jo raushan ai dost
lau usi sham.a ki larzan hai ghazal kya kahiye
asman sar pe uTha.e hai zamin ki shorish
ek hangama-e-tufan hai ghazal kya kahiye
ḳhun-e-mazlum se aluda hai chappa chappa
har taraf ganj-e-shahidan hai ghazal kya kahiye
phuul murjha.e hue nabz-e-chaman afsurda
ruḳhsat-e-fasl-e-baharan hai ghazal kya kahiye
har taraf amn ke na.aron se faza hai mamur
har taraf jang ka saman hai ghazal kya kahiye
ghair to ghair hain is daur-e-siyah-baḳhti men
apna saaya bhi gurezan hai ghazal kya kahiye
ab to siine men baja.e dil-e-sozan ‘faruq’
ek sho.ala sa farozan hai ghazal kya kahiye
Leave a Reply