Syed Mohammad Askari Arif
zulm mujh par shadid kar baiThe
phir vo kar-e-yazid kar baiThe
be-vafa.i bhi vo nibha na sake
ham vafa ki umiid kar baiThe
jin pe marta tha tu vo sad-afsos
mire marne pe iid kar baiThe
kis qadar ḳhush-nasib hoga vo jo
tiri ḳhvabon men diid kar baiThe
ham the ḳhushiyon ko bechne nikle
dard-o-gham ki ḳharid kar baiThe
kaash nafrat ke leaderon ko koi
do tamanche rasid kar baiThe
aisi daulat ka fa.eda kya hai
jo ḳhuda se ba.iid kar baiThe
kaun jaane ki ishq men kitne
apni miTTi palid kar baiThe
miT ga.i qadr mar ga.e adab
ham yuun ḳhud ko jadid kar baiThe
kaash ye meri sha.iri ‘arif’
us ko mera murid kar baiThe
Leave a Reply