nahin tha koi sitara tire barabar bhi
hua ghurub tire saath tera manzar bhi
pighalte dekh rahe the zamin pe sho.ale ko
ravan tha aankh se ashkon ka ik samundar bhi
kahin vo lafz men zinda kahin vo yadon men
vo bujh chuka hai magar hai abhi munavvar bhi
ajab ghulavaTen shahd-o-namak ki nutq men thi
vahi suḳhan ki tha marham bhi aur nashtar bhi
munafiqon ki baḌi fauj us se Darti thi
aur us ke paas na tha koi lav-lashkar bhi
Leave a Reply