Dil Apni Talab Mein Sadiq Tha Ghabra Ke Su-E-Matlub Gaya

dil apni talab men sadiq tha ghabra ke su-e-matlub gaya

dariya se ye moti nikla tha dariya hi men ja kar Duub gaya

ahval-e-javani piiri men kya arz karun ik qissa hai

vo tarz gai vo vaza gai andaz gaya uslub gaya

la-raib khamoshi ne teri tasir dikha di maston ko

be-bak jo mai-kash tha saaqi us bazm se vo mahjub gaya

be-rahila-va-be-zad-e-safar rahmat pe bharosa farma kar

jo mulk-e-adam men basne ko is tarah gaya vo khuub gaya

bad-hal bahut tha us par bhi ai yaar kisi ne li na khabar

bad maar ke tere kuche se akhir ko tira majzub gaya

rizvan ne kiya dar khuld ka va huren huiin sadqe aa aa kar

ghilman ne qadam chume us ke jo teri taraf mansub gaya

taqat jo nahin ab hairat se tasvir ka aalam rahta hai

vo akhir-e-shab ki aah gai vo laghra-e-mahbub gaya

yaan apni saza bhugti us ne rahmat ki nazar hogi us par

har-chand khata-kar-e-ulfat kuche se tire maatub gaya

hairat hai abas ai jo in besh-baha mansubon par

is tarah ke moti tab nikle jab zer-e-zamin main Duub gaya

kya us ka sabab main arz karun kuchh vaqiye aise pesh aae

main rota hua aaya tha yahan chup yaan se gaya marub gaya

kuche men tire ab ‘shad’ nahin le paak khuda ne ki ye zamin

sad shukr sara-e-fani se akhir vo sag-e-maayub gaya

Leave a Comment