tiri gali se guzarne ko sar jhuka.e hue
faqir hujra-e-haft-asman uTha.e hue
koi daraḳht sara.e ki jis men ja baiThen
parinde apni pareshaniyan bhula.e hue
mire saval vahi TuT-phuT ki zad men
javab un ke vahi hain bane-bana.e hue
hamen jo dekhte the jin ko dekhte the ham
vo ḳhvab ḳhaak hue aur vo log saa.e hue
shikariyon se mire ehtijaj men ‘babar’
daraḳht aaj bhi shamil the haath uTha.e hue
Leave a Reply