Poet
bahar aai junun lega hamara imtihan dekhen
namak dega dil-e-zakhmi ko shor-e-bulbulan dekhen
siya hai zakhm-e-bulbul gul ne khaar aur bu-e-gulshan se
suui taaga hamare chak-e-dil ka hai kahan dekhen
hamen dil-sozi hamesha yahan tak diin o iman hai
ki ji jalta hai jab ham bulbul-e-fasl-e-khizan dekhen
guzar jaati hai dil se tiir ho kar yaad us qad ki
jahan ham-dosh-e-ashiq ham koi abru-kaman dekhen
huma se bach ke mujh majnun ko daulat ishq ki ho jo
sag-e-laila ki qismat honge mere ustukhan dekhen
chala huun ‘uzlat’ ab sahra bagule ki ziyarat ko
milega tauf ko majnun ka barbad astan dekhen
Leave a Reply