uljhanen itni thiin manzar aur pas-manzar ke biich
rah ga.i saari masafat miil ke patthar ke biich
ruḳh se ye parda haTa behosh kar mujh ko tabib
guftugu jitni bhi ho phir zaḳhm aur nashtar ke biich
us ko kya ma.alum ahval-e-dil-e-shisha-garan
varna aa jaata kabhi to haath aur patthar ke biich
shauq-e-sajda bandagi varaftagi aur be-ḳhudi
mo’tabar sab us ki chaukhaT aur mere sar ke biich
ik qayamat husn us ka aur vo bhi jalva-gar
main faqat mab.hut jaadu aur jadugar ke biich
main bhi ḳhuddari ka maara tha safa.i kuchh na di
us ne bhi matlab nikale lafz aur tevar ke biich
vaqt aur masrufiyat ke mas.ale sab ik taraf
duriyan itni nahin thiin ‘taj’ apne ghar ke biich
Leave a Reply