Na Koi Din Na Koi Raat Intizar Ki Hai

Ayub Khawar

na koi din na koi raat intizar ki hai

ki ye juda.i bharose ki e’tibar ki hai

jo ḳhaak uḌi hai mire dukh sameT lenge use

jo bichh ga.i sar-e-manzar vo rahguzar ki hai

vo vasl ho ki khule aa.ine pe aks-e-jamal

ye aarzu hai magar baat iḳhtiyar ki hai

isi ka naam hai vahshat-sara-e-jan men charagh

usi ke lams men dhaḌkan dil-e-figar ki hai

ye kaun tha jo sar-e-bam ḳhud ko bhuul gaya

ye kis ka raqs thaa, gardish ye kis ghubar ki hai

ye kaun mujh men hare mausamon utarta hai

ye kaise rang hain ḳhushbu ye kis dayar ki hai

bujhane vaale ne ‘ḳhavar’ bujha diya hai charagh

yahi Thaharne ki saa.at yahi mazar ki hai