Nirmal Nadeem
vafa ki raah men dushvariyan bahut si hain
magar junun ki bhi tayyariyan bahut si hain
jalal apni mohabbat ka sab se uncha hai
badan men aise to bimariyan bahut si hain
hamare paas faqat dil ka dard hai lekin
tumhare paas to ayyariyan bahut si hain
har ek shaḳhs ki fikren juda juda Thahrin
jahan-e-am men ḳhuddariyan bahut si hain
vafa ki saari misalen gina to duun lekin
vatan men apne bhi ghaddariyan bahut si hain
dilon men palte hue ḳhvab jante hi nahin
tabah karne ko be-kariyan bahut si hain
kisi ne mujh se kaha tha ki yaar sun to sahi
ada men husn ki makkariyan bahut si hain
saji hai bazm-e-mohabbat ye jaan kis ke liye
yahan to logon men bezariyan bahut si hain
‘nadim’ kyuun tu tah-e-iztirab Duub gaya
dilon ke khel men bhi pariyan bahut si hain
Leave a Reply