Haris Bilal
apna milan kisi ki dili bad-dua bhi hai
ya.ani hamara vasl hamari saza bhi hai
al-muḳhtasar tumhari mahak oḌhte hue
ehsas ho gaya ki use phailna bhi hai
is par Thahar sake to Thahar chal sake to chal
ye dil qayam-gah bhi hai rasta bhi hai
achchha tiri nazar men bahut muḳhtalif huun main
ya.ani tiri nazar men koi dusra bhi hai
saari hison ki Dor sama.at ko saunp kar
us dil pe kaan rakh ki ḳhuda bolta bhi hai
tujh se ḳhushi ghami ka tafarqe miTa ki tu
ik ḳhush-gavar yaad bhi hai saneha bhi hai
har ek dastan ke har ek moḌ par
‘haris’ ye sochna kabhi aisa hua bhi hai
Leave a Reply