meri manzil kahan hai kya ma.alum
intiha gham hai ibtida ma.alum
tum nahin mere ab ye raaz khula
main tumhara huun ab hua ma.alum
dil ki parva kare koi kab tak
chahta kya hai ye ḳhuda ma.alum
duur se gul ko dekhna kya hai
yuun to hota hai ḳhushnuma ma.alum
paas aa.e to asl husn khule
duur ki chiiz raz-e-na-ma.alum
tum ko chaha baḌa qusur kiya
sahv zahir hai aur ḳhata ma.alum
baat banti nazar nahin aati
un ke tevar se ho gaya ma.alum
vaz.a-dari se chup rahun varna
hai mujhe raaz aap ka ma.alum
kaun hai jis ko ḳhu-e-e-maula ka
raz-e-sar-basta ho saka ma.alum
is qadar jald maut aa.egi
haa.e insan ko ye na tha ma.alum
main vafa bhi karun gile bhi karun
mujh ko hota hai ye bura ma.alum
kya kahen kis liye rahe ma.atub
ham ko ab tak nahin ḳhata ma.alum
chal ke ‘sho.ala’ se puchhiye kyunkar
jurm sabit hua saza ma.alum
Leave a Reply