rasm-e-mehr-o-vafa ki baat karen
phir kisi dilruba ki baat karen
saḳht begana-e-hayat hai dil
aao us ashna ki baat karen
zulf o ruḳhsar ke tasavvur men
husn o naz-o-ada ki baat karen
gesuon ke fasane dohra.en
apne baḳht-e-rasa ki baat karen
mudda.a-e-vafa kise ma.alum
dil-e-be-mudda.a ki baat karen
kashti-e-dil ka naḳhuda dil hai
kyuun kisi naḳhuda ki baat karen
bhuul jaa.en jahan ke jaur-o-sitam
apni mehr-o-vafa ki baat karen
ham se azurda hai tabassum-e-dost
isi husn-e-ada ki baat karen
Leave a Reply