vo nigah jab mujhe pukarti thi
dil ki hairaniyan ubharti thi
apni nadida ungliyon ke saath
mere balon ko vo sanvarti thi
roz main us ko jiit jaata tha
aur vo roz ḳhud ko harti thi
pattiyan muskurane lagti thiin
shaḳh se phuul jab utarti thi
jin dinon main use pukarta tha
ek duniya mujhe pukarti thi
sehn men chhanv thi daraḳhton ki
jo miri sha.iri nikharti thi
bargahon men ghusl-e-girya se
ruuh apni thakan utarti thi
ik lagan thi chubhan thi jo bhi thi
roz siine men din guzarti thi
Leave a Reply