ashk Tapke haal dil ka khul gaya
dida-e-giryan se parda khul gaya
dil se umDe ashk-e-ḳhun ankhon ki raah
josh-e-mai se ḳhum ka Dhakna khul gaya
kucha-e-janan ki milti thi na raah
band kiin ankhen to rasta khul gaya
har girah men us ke the ashiq ke dil
zulf ke khulte hi uqda khul gaya
nargis-e-jadu hai ab alam-fareb
zulf ka logon pe laTka khul gaya
jaan kar anqa kamar ko yaar ke
zulf ne phansa tha phanda khul gaya
aaj kyunkar ho ḳhabar us ko ‘nasim’
sher paḌhne ka bhi fiqra khul gaya
Leave a Reply