Baat Phulon Ki Suna Karte The

Saghar Siddiqui

baat phulon ki suna karte the

ham kabhi sher kaha karte the

mish.alen le ke tumhare gham ki

ham andheron men chala karte the

ab kahan aisi tabi.at vaale

choT kha kar jo dua karte the

tark-e-ehsas-e-mohabbat mushkil

haan magar ahl-e-vafa karte the

bikhri bikhri hui zulfon vaale

qafile rok liya karte the

aaj gulshan men shagufe ‘saghar’

shikva-e-bad-e-saba karte the