aisa lagta hai jaise puuri hai
ye kahani magar adhuri hai
hijr to ḳhair us ka lazim tha
vasl bhi ab bahut zaruri hai
meri ankhon ke jurm men shamil
un nigahon ki be-qusuri hai
mere alfaz ho rahe hain ḳharch
qaum ki muft men mash.huri hai
yuun mira taj-o-taḳht chhin liya
jaise vo sher-shah-suri hai
in dinon us ke samne dil ki
ji-huzuri hi ji-huzuri hai
kis qadar shoḳh kar diya mujh ko
ishq miTThu-miyan ki churi hai
Leave a Reply