Arshad Abdul Hamid
ḳhamoshi tak to ek sada le ga.i mujhe
phir us se aage tab-e-rasa le ga.i mujhe
kya aankh thi ki mauj-e-baqa ki tarah mili
kya mauj thi ki misl-e-fana le ga.i mujhe
miTTi ko chuum lene ki hasrat hi rah ga.i
TuuTa jo shaḳh se to hava le ga.i mujhe
dasht-e-junun se aa.i thi basti men bad-e-shauq
lauTi to apne saath baha le ga.i mujhe
ai jur.at-e-farar tira shukriya ki tu
rishton ke pech-o-ḳham se bacha le ga.i mujhe
Leave a Reply