hua na ḳhatm azabon ka silsila ab tak
ḳhizan ki zad men bhi ik phuul hai hara ab tak
mila tha zahr jo virse men pi rahe hain ham
na us ne sulh ki sochi na main jhuka ab tak
ye sach hai vahm ke daldal se lauT aaya huun
magar yaqin ka dhundla hai aa.ina ab tak
inhi ghamon ka vo ik din hisab mangega
falak se jo mire kashkol men paḌa ab tak
abhi abhi miri ankhon ne kho diya us ko
vo dard ban ke miri siskiyon men tha ab tak
na jaane kitni bali di hai rat-jagon ki use
magar mila na vo ḳhvabon ka devta ab tak
juda hui thi jahan mil ke zindagi ik din
bhaTak rahi hai vahin meri aatma ab tak
Leave a Reply