Nazm Tabatabai
ye hua ma.aal hubab ka jo hava men bhar ke ubhar gaya
ki sada hai lutma-e-mauj ki sar-e-pur-ghurur kidhar gaya
mujhe jazb-e-dil ne ai juz bahak ke rakha qadam koi
mujhe par laga.e shauq ne kahin thak ke main jo Thahar gaya
mujhe piiri aur shabab men jo hai imtiyaz to is qadar
koi jhonka bad-e-sahar ka tha mire paas se jo guzar gaya
asar us ke ishva-e-naz ka jo hua vo kis se bayan karun
mujhe to ajal ki hai aarzu use vahm hai ki ye mar gaya
tujhe ai ḳhatib-e-chaman nahin ḳhabar apne ḳhutba-e-shauq men
ki kitab-e-gul ka varaq varaq tiri be-ḳhudi se bikhar gaya
kise tu sunata hai ham-nashin ki hai ishva-e-dushman-e-aql-o-din
tire kahne ka hai mujhe yaqin main tire Darane se Dar gaya
karun zikr kya main shabab ka sune kaun qissa ye ḳhvab ka
ye vo raat thi ki guzar ga.i ye vo nashsha tha ki utar gaya
dil-e-na-tavan ko takan ho mujhe us ki taab na thi zara
gham-e-intizar se bach gaya tha naved-e-vasl se mar gaya
mire sabr-o-tab ke samne na hujum-e-ḳhauf-o-raja raha
vo chamak ke barq rah ga.i vo garaj ke abr guzar gaya
mujhe bahr-e-gham se ubuur ki nahin fikr ai mire chara-gar
nahin koi chara-kar ab mire sar se aab guzar gaya
mujhe raz-e-ishq ke zabt men jo maza mila hai na puchhiye
mai-e-angbin ka ye ghunT tha ki gale se mere utar gaya
nahin ab jahan men dosti kabhi raste men jo mil ga.e
nahin matlab ek ko ek se ye idhar chala vo udhar gaya
agar aa ke ghussa nahin raha to lagi thi aag ki bujh ga.i
jo hasad ka josh faro hua to ye zahr chaḌh ke utar gaya
tujhe ‘nazm’ vadi-e-shauq men abas ehtiyat hai is qadar
kahin girte girte sambhal gaya kahin chalte chalte Thahar gaya
Leave a Reply