Dil Aaina Hai Jauhar-E-Aks Ru Hai

dil aaina hai jauhar-e-aks ru hai

yuun hi tujh se main huun yuun hi mujh men tu hai

agar gul hai tu jan-e-bulbul bhi tu hai

tu har rang men rang tu har bu men bu hai

miri khaak ashk-e-nadamat se tar hai

tayammum bhi kariye to hukm-e-vuzu hai

baja lan-tarani hai khamosh hain ham

jo uth jaae parda to phir guftugu hai

tiri zulf-e-purkham ka divana huun main

na zanjir-e-pa hai na tauq-e-gulu hai

tasavvur men abru ke jo mar gaya huun

pas-e-marg kaaba mire ru-ba-ru hai

gareban-e-sad-chak hai daman-e-gul

na paivand ki ja na kar-e-rafu hai

tire munh ko dekhun tire saath souun

ye hi hasrat-e-dil ye hi aarzu hai

main dauran-e-sar se jo sar phodta huun

na mai hai na saaqi na jam-e-subu hai

chhuri kya hai talvar bhi maar qatil

qaba-e-badan ko bhi shauq-e-rafu hai

nahata hai ghairon ke hamrah qatil

mire ab-e-shamshir hi ta-gulu hai

tire jalve se hai dil-e-‘arsh’ raushan

jo vo subh-e-sadiq to khurshid tu hai

Leave a Comment