Poet
saaf baton se ho gaya ma.alum
hote ho matlab-ashna ma.alum
kushta tegh-e-nigah se kijiyega
chashm-o-abru se ho gaya ma.alum
ibtida ne mohabbat-e-dil ki
ye na thi ham ko intiha ma.alum
kuchh dahan hi nahin hai vo napaid
kamar-e-yar bhi hai na-ma.alum
dar tak us ke miri rasa.i ho
tujh se ai baḳht-e-na-rasa ma.alum
jab kaha roke tujh pe marte hain
hans ke bola vo but ḳhuda-ma.alum
mehrban aj-kal hai vo be-mehr
us men hoti hai kuchh dua ma.alum
tum suḳhan-saz ho baḌe ai jaan
tarz-e-taqrir se hua ma.alum
jab muamme men zikr-e-vasl kiya
bola matlab na kuchh hua ma.alum
bad-guman duḳht-e-raz se vaa.iz ho
ham ko hoti hai parsa ma.alum
le ke dil vo karega bedardi
ye na Dhang us ka qabl tha ma.alum
qabil-e-ishq ye hasin nahin
in dagha-bazon se vafa ma.alum
jab kaha main ne o taghaful-kesh
haal hai mere ishq ka ma.alum
misl-e-a.ina hairati huun qadim
bola lakhon hain aise kya ma.alum
haan magar ham ko dekha to hai kahin
hote ho surat-ashna ma.alum
sabiqa jab tak ai ‘qalaq’ na paḌe
haal insan ka ho kya ma.alum
Leave a Reply