ḳhala-e-fikr ka ehsas arz-e-fan se mila
barahnagi men naya lutf pairahan se mila
qadam qadam pe uge zaḳhm-e-arzu bhi hazar
hazar rang-e-tamasha bhi is chaman se mila
baḌha ke haath kahin uljhanen hi chhin na len
vo jaam bhi jo mujhe sham-e-anjuman se mila
sahar ko be-khili kaliyon men DhunDhti hai kiran
jo lutf-e-jalva laja.i hui dulhan se mila
usi ke sog men baiTha hua huun muddat se
jo ek zaḳhm rafiqan-e-ham-vatan se mila
ghuru-e-ḳhush-nazari nazish-e-aqida-o-rang
hazar rog usi zom-e-ma-o-man se mila
hujum-e-yas men tahzib-e-nafs ka ahang
tiri hi narm-ḳhirami ke bankpan se mila
vo hausla jo na.i raah ki talash men hai
gali gali men bhaTakti hui kiran se mila
har ek haal men jiine ka jagmagane ka shauq
andheri shab men sitaron ki anjuman se mila
ishara fikr ko mahmez hashr-parvar ka
ḳhata muaaf ho tere hi bankpan se mila
ab is shu.ur ko mahsur-e-zat kaise karun
shu.ur zaat ki ‘zaidi’ baḌe jatan se mila
Leave a Reply