tum aa ga.e ho jab se khaTakne lagi hai shaam
saghar ki tarah roz chhalakne lagi hai shaam
shayad kisi ki yaad ka mausam phir aa gaya
pahlu men dil ki tarah dhaḌakne lagi hai shaam
kuchh tu hi apne ḳhun-e-ramida ki le ḳhabar
palkon pe qatra qatra Tapakne lagi hai shaam
sahra-e-pur-sukut men kuchh ahuon ke saath
phir kis ki aarzu men bhaTakne lagi hai shaam
kya jaane aaj kyuun kisi mazdur ki tarah
suraj ghurub hote hi thakne lagi hai shaam
kuchh aur aa.ina men sanvarne lage hain vo
jis din se un pe jaan chhiḌakne lagi hai shaam
‘dauran’ suna hai surat-e-gesu-e-ambarin
imsal phir chaman men mahakne lagi hai shaam
Leave a Reply