Rashid Shahjahanpuri
ḳhirad ne laakh sar-o-barg-e-ijtinab kiya
tiri nigah ko mire dil ne kamyab kiya
karam bhi tu ne jo ai asman-janab kiya
sukun-e-dil ko mubaddal-ba-iztirab kiya
nisar us nigah-e-dil-navaz ke jis ne
asir-e-dard kiya vaqf-e-iztirab kiya
mujhe tiri nigah-e-intiḳhab par hai ye rashk
jahan bhar se mujhe us ne intiḳhab kiya
dil-e-hazin gila-e-jaur us se jis ne tujhe
harim-e-ishq-o-mohabbat men baryab kiya
karam nahin na sahi jaur-e-na-rava hi sahi
ye kam nahin ki mujhe tu ne intiḳhab kiya
nigah-e-shauq ki gustaḳhiyan ma.az-allah
kise harim-e-tasavvur men be-naqab kiya
‘rashid’ ishq kisi haal men gunah nahin
chalo gunah sahi ab to irtikab kiya
Leave a Reply