shaKH shaKH Par Mausam-E-Gul Ne Gajre Se laTkae The

Noor Bijnauri

shaḳh shaḳh par mausam-e-gul ne gajre se laTka.e the

main ne jis-dam haath baḌhaya saare phuul para.e the

kitne dard chamak uThte hain furqat ke sannaTe men

raat rat-bhar jaag ke ham ne ḳhud pe zaḳhm laga.e the

tere ghamon ka zikr hi kya ab jaane de ye baat na chheḌ

ham divane mulk-e-junun men baḳht-e-sikandar laa.e the

dil ki viran basti mujh se akasr puchha karti hai

baste hain kis des men ab vo log yahan jo aa.e the

pichhli raat ko taare ab bhi jhilmil karte hain

kis ko ḳhabar hai ik shab ham ne kitne ashk baha.e the

aaj jahan ki tariki se duniya bach kar chalti hai

ham ne us viran mahal men lakhon diip jala.e the

mujh ko un se pyaar nahin hai mujh ko un ke naam se kya

ankhen yuun hi bhar aa.i thiin honT yunhi tharra.e the