Zabt-E-Gham Par Zawal Kyon Aaya

zabt-e-ġham par zavāl kyoñ aayā

shiddatoñ meñ ubaal kyoñ aayā

gul se khilvāḌ kar rahī thī havā

dil ko terā ḳhayāl kyoñ aayā

ishq to hijr keī alāmat hai

vasl kā phir savāl kyoñ aayā

aisā badlī ne kyā kiyā āḳhir

sūraj itnā niDhāl kyoñ aayā

suunī āñkhoñ meñ kyā milā tum ko

jhiil jaisā ḳhayāl kyoñ aayā

umr bhar ā.īne pe rakhī nazar

aks meñ phir ye baal kyoñ aayā

yūñhī pāgal havā ke chhūne se

tujh meñ dariyā uchhāl kyoñ aayā

ishq tum ko nahīñ huā to kaho

shā.irī meñ kamāl kyoñ aayā

Leave a Comment