apna sa shauq auron men laaen kahan se ham
ghabra gae hain be-dili-e-hamrahan se ham
kuchh aisi duur bhi to nahin manzil-e-murad
lekin ye jab ki chhut chalen karvan se ham
ai yad-e-yar dekh ki ba-vasf-e-ranj-e-hijr
masrur hain tiri khalish-e-na-tavan se ham
malum sab hai puchhte ho phir bhi muddaa
ab tum se dil ki baat kahen kya zaban se ham
ai zohd-e-khushk teri hidayat ke vaste
saughat-e-ishq laae hain ku-e-butan se ham
betabiyon se chhup na saka hal-e-arzu
akhir bache na us nigah-e-bad-guman se ham
pirana-sar bhi shauq ki himmat buland hai
khvahan-e-kam-e-jan hain jo us naujavan se ham
mayus bhi to karte nahin tum za-rah-e-naz
tang aa gae hain kashmakash-e-imtihan se ham
khalvat banegi tere gham-e-jan-navaz ki
lenge ye kaam apne dil-e-shadman se ham
hai intiha-e-yas bhi ik ibtida-e-shauq
phir aa gae vahin pe chale the jahan se ham
‘hasrat’ phir aur ja ke karen kis ki bandagi
achchha jo sar uthaen bhi is astan se ham
Leave a Reply