zamin hai miri asmani nahin huun
faqat ek qissa kahani nahin huun
nadi ki tarah bahti apni hadon men
samundar ki koi ravani nahin huun
na kar khelne ki tu gustaḳhi mujh se
main ik aag huun koi paani nahin huun
ka.i mujh men kirdar sansen hain lete
kahani men huun zindagani nahin huun
amavas na punam se mujh ko gharaz hai
mahakti hui rat-rani nahin huun
main jaisi thi kal huun vahi aaj bhi main
badalti ruton ki nishani nahin huun
Leave a Reply