Maine Dariya Ko Nekiyan Din Hain

maiñ ne dariyā ko nekiyāñ diiñ haiñ

us ne badle meñ machhliyāñ diiñ haiñ

bachche bārish bhī mujh se māñgte haiñ

jab se kāġhaz kī kashtiyāñ diiñ haiñ

fā.ede ḳhud-kushī ke samjhā kar

us ne tohfe meñ rassiyāñ diiñ haiñ

muntazir hai mire utarne kā

jis ne chaḌhne ko sīḌhiyāñ diiñ haiñ

ziist ke raaz kholne ke liye

chand sāñsoñ kī chābiyāñ diiñ haiñ

us ko masrūf dekh kar maiñ ne

apnī fursat ko gāliyāñ diiñ haiñ

kab milī muft meñ vafādārī

pahle kutte ko haDDiyāñ diiñ haiñ

Leave a Comment