Syed Sarosh Asif
main ne dariya ko nekiyan diin hain
us ne badle men machhliyan diin hain
bachche barish bhi mujh se mangte hain
jab se kaghaz ki kashtiyan diin hain
fa.ede ḳhud-kushi ke samjha kar
us ne tohfe men rassiyan diin hain
muntazir hai mire utarne ka
jis ne chaḌhne ko siḌhiyan diin hain
ziist ke raaz kholne ke liye
chand sanson ki chabiyan diin hain
us ko masruf dekh kar main ne
apni fursat ko galiyan diin hain
kab mili muft men vafadari
pahle kutte ko haDDiyan diin hain
Leave a Reply