Ishrat Afreen
numu ke irfan se be-ḳhabar huun
ki lala-e-dasht-e-be-shajar huun
ye zard phulon ke kunj dekho
yahan bhi aao ki main idhar huun
vo phuul hai shaḳh par rahega
main us ki ḳhushbu huun dar-ba-dar huun
vo zindagi ki saza ka lamha
us ek lamhe ka main samar huun
mujhe uThane ka haq hai kis ko
ki apni turbat pe nauhagar huun
vo kaj-kulahon ki bastiyan hain
vahan na le chal main nange sar huun
Leave a Reply