Iqbal Azeem
jis anjuman men dekho begane rah ga.e hain
ginti ke log jaane pahchane rah ga.e hain
kal jin haqiqaton se mahaul mo’atabar tha
aaj un haqiqaton ke afsane rah ga.e hain
ab gharat-e-chaman men kya rah gaya hai baaqi
kuchh pairahan-darida divane rah ga.e hain
tariḳh-e-ahd-e-rafta bil-iḳhtisar ye hai
gulshan jahan jahan the virane rah ga.e hain
‘iqbal’ DhunDhte ho tum jin ko mahfilon men
un ki jagah ab un ke afsane rah ga.e hain
Leave a Reply