Ahmad Ameer Pasha
halat mire dil ko lagane nahin dete
ankhon men tire khvab sajane nahin dete
zulmat ke pujari to bahut tang-nazar hain
jashn-e-shab-e-tarik manane nahin dete
ankhon pe to bilkul hi koi bas nahin chalta
ham khud ko tiri bazm men jaane nahin dete
jannat ki duaen mujhe dete hain sabhi log
is ahd men jiine ke bahane nahin dete
nafrat ki rivayat ke paband hain lahje
ruthe hue logon ko manane nahin dete
kuchh khvab miri zaat se badh kar bhi to hain jo
phir dil ko tiri aas lagane nahin dete
sukhe hue phuul aur tire lams ki khushbu
sadma tire jaane ka bhulane nahin dete
goyai hai paband-e-salasil ki ‘amir’ ab
sahra men bhi avaz lagane nahin dete
Leave a Reply