Phul Zamin Par Gira Phir Mujhe Nind Aa Gai

Rais Farogh

phuul zamin par gira phir mujhe niind aa ga.i

duur kisi ne kuchh kaha phir mujhe niind aa ga.i

abr ki oT men kahin narm si dastaken huiin

saath hi koi dar khula phir mujhe niind aa ga.i

raat bahut hava chali aur shajar bahut Dare

main bhi zara zara Dara phir mujhe niind aa ga.i

aur hi ek samt se aur hi ik maqam par

gard ne shahr ko chhua phir mujhe niind aa ga.i

apne hi ek ruup se taaza suḳhan ke darmiyan

main kisi baat par hansa phir mujhe niind aa ga.i

tu kahin as-pas tha vo tira iltibas tha

main use dekhta raha phir mujhe niind aa ga.i

ek ajab firaq se ek ajab visal tak

apne ḳhayal men chala phir mujhe niind aa ga.i