log ki jin ko tha bahut zom-e-vajud shahr men
phail ke rah ga.e faqat surat-e-dud shahr men
ham se jahan anek the bad the vahi ki nek the
sach hi to hai ki ek the bud-o-nabud shahr men
tangi-e-rizq ka gila jin ko yahan sada raha!
toḌ ke dekhte zara apni hudud shahr men
itne baras ke ba.ad bhi log hain ham se ajnabi
jaane hua tha kis ghaḌi apna varud shahr men
rah-e-amal pe gher ke ḳhud ko hi laao pher ke
vo to gaya bikher ke rang-e-jumud shahr men
mujh ko chalo na manta naam to koi janta
main bhi jo yaar chhanta ḳhak-e-numud shahr men
mujh se vo kya bichhaḌ gaya aur bhi main ujaḌ gaya
chhoḌ ke mujh ko baḌh gaya mera vajud shahr men
mujh se zamin-e-zer-e-pa us ne jo chhin li to kya
ḳham to nahin hua mira ḳhatt-e-umud shahr men
Leave a Reply