Poet
ham mar ga.e pa shikve ki munh par na aa.i baat
kyuun be-zaban ashiqon ki azma.i baat
dava-e-ishq karne ka kya munh kisi ka tha
kam bolne ne tere ye saari baḌha.i baat
ham-peshgi ki mujh se kare guftugu raqib
munh us ka dekho hai ye tumhari sikha.i baat
sab kuchh paḌhaya ham ko murdarris ne ishq ke
milta hai jis se yaar na aisi paḌha.i baat
apna kise kahun na kahun kis ko hai ghazab
jis vaqt munh se nikli hui phir para.i baat
kya ghair ne kaha ki lage budbudane tum
main ne bhi chheḌne ki na.i ab to paa.i baat
mazkura kal ka jaane do ho jaoge ḳhafa
thamti nahin zaban pe jis vaqt aa.i baat
majnun ke naam se mira haal us ne tab suna
shukr-e-ḳhuda ki ḳhuub ban aa.i bana.i baat
bulbul ka naala aage mire is tarah se hai
jis tarah shahriyon se kare rusta.i baat
taqrir-e-saf par jo ‘raza’ ki kare nazar
andhe ke ta.iin ajab nahin deve dikha.i baat
Leave a Reply