Hai Aasebon Ka Saya Main Jahan Hun

hai asebon ka saaya main jahan huun

shab-e-dasht-e-bala men be-aman huun

hava ki zad pe jaise shama ki lau

main apne hauslon ka imtihan huun

charaghan sa hai darvaze pe lekin

main andar se koi tiira makan huun

vo badal tha hava ka ham-safar tha

main tishna-kam fasl-e-raigan huun

sutun kachche the barish sah na paae

sulagti dhuup men be-saeban huun

pata mera ab us ko kya milega

nishan hote hue bhi be-nishan huun

Leave a Comment