Qabil Ajmeri
ashkon men husn-e-dost dikhati hai chandni
shabnam ko chaar chand lagati hai chandni
ab bhi udaas udaas hain raten tire baghair
ab bhi bujhi bujhi nazar aati hai chandni
jis ne charagh-e-sham-e-ghariban bujha diya
us haath ka mazaq uḌati hai chandni
tere farogh-e-husn se ye bhi na ho saka
nazron ke hausle to baḌhati hai chandni
ḳhush-bu-e-intizar se mahki hui hai raat
‘qabil’ na jaane kis ko bulati hai chandni
Leave a Reply